Полицијата пресече транспорт на поголема количина марихуана на автопатот „Пријателство“ во близина на Градско, при што се уапсени две лица, информираат од Министерството за внатрешни работи.
Акцијата била реализирана на 3 април од страна на полициски службеници од Одделот за сузбивање на организиран и сериозен криминал, во координација со специјалната единица „Тигар“, преку спроведување на оперативно-тактичка мерка „заседа“, со цел спречување на недозволена трговија со дрога.
При контролата на наплатната рампа Стоби, полицијата забележала сомнително движење на патничко возило „сеат алтеа“ со скопски регистарски ознаки. Откако му бил даден знак да застане, возачот не постапил по наредбата и се дал во бегство кон Градско. По кратка потера, полицијата го запрела возилото и извршила преглед.
Во возилото, управувано од 38-годишниот Ф.Н. од Скопје, биле пронајдени четири црни торби со вкупно 65 пакувања растителна материја, со вкупна тежина од околу 65 килограми, како и два мобилни телефони.
Двете лица, меѓу кои и 55-годишен жител на Кавадарци, се лишени од слобода и спроведени во полициска станица во Велес.
Против нив ќе биде поднесена кривична пријава до Основното јавно обвинителство Велес, поради сомнение за сторено кривично дело неовластено производство и пуштање во промет наркотични дроги.
Запленетата материја, по наредба на јавен обвинител, ќе биде предадена на вештачење во Одделот за форензички испитувања при МВР.
