Полицијата разоткри серија измами поврзани со лажни сообраќајни незгоди, при што е уапсен 38-годишен жител на Охрид, осомничен дека во повеќе наврати незаконски прибавил значителна имотна корист.
Како што информира Сектор за внатрешни работи Штип, во координација со Оддел за криминалистичка полиција биле преземени оперативно-тактички мерки за расчистување на претходно сторени кривични дела „измама“.
Во акцијата бил лишен од слобода П.С. (38), кој по службениот разговор признал и појаснил детали за начинот, местото и времето на извршување на девет кривични дела.
Од нив, шест биле извршени на подрачјето на Штип, а три во Виница. Според проценките, оштетените граѓани претрпеле вкупна материјална штета од околу 3.600.000 денари.
Против осомничениот е поднесена кривична пријава по итна постапка до Основно јавно обвинителство Штип, а по предлог на обвинителството тој бил изведен пред судија на претходна постапка, кој му одредил мерка притвор.
Истрагата продолжува со цел утврдување дали лицето е поврзано и со други слични случаи.
