Вистински револт се појави кај камионџиите и дел од возачите откако, според сведоштва испратени до редакцијата на „Македонија Денес“, на повеќе бензински станици вчера – во недела ин било ограничено или целосно забрането точење на гориво, особено дизел.
Најпогодени од ваквата ситуација биле камионџиите, на кои на некои бензински станици им било кажано дека не можат да наточат нафта, иако според нивните тврдења гориво имало.
Камионџии тврдат дека биле одбиени на пумпи
Еден камионџија од Скопје за редакцијата раскажува дека на бензинска станица во скопски Карпош му било одбиено точење на нафта.
„Застанав на бензинска станица во Карпош, а оттаму дрско ми рекоа дека не можат да ми наточат нафта. Ги прашав која е причината, но одбиваа да одговорат. Во исто време на друга пумпа се точеше нафта на автомобил“, раскажува тој.
Проблеми и кај други возачи
Според него, истиот проблем го имале и други камионџии.
„И мои колеги се соочија со истата ситуација. Мора да работиме, имаме закажани тури, а тие не ни даваат нафта иако имаат“, додава возачот.
Возачите бараат објаснување
Камионџиите бараат одговор од надлежните институции и од компаниите кои управуваат со бензинските станици дали постои некаква одлука за ограничување на точењето дизел гориво или станува збор за интерна политика на одделни бензински станици.
Засега нема официјална информација од институциите или од компаниите што стојат зад бензинските станици за причините поради кои на некои возачи им било одбиено точење на гориво.
