Утрово возачите низ земјава се соочуваат со зимски услови за возење, а на одредени планински делници веќе се воведени ограничувања поради снег.
Според информациите на Авто-мото сојуз на Македонија, од 05:45 часот е воведена забрана за движење на тешки товарни возила на патниот правец крак Маврово – Дебар, поради врнежи од снег и отежнати услови на коловозот.
На останатите државни патишта сообраќајот се одвива без поголеми застои, но по влажни коловози, додека на повисоките места во западниот и југозападниот дел има остатоци од кашест снег.
Врнежи од снег со променлив интензитет се бележат во Крушево, Попова Шапка, Маврово, како и на планинските премини Стража, Ѓавато и Пресека. На Буково има мешани врнежи од дожд и снег.
Од АМСМ потсетуваат дека зимската опрема е задолжителна за сите возила до 15 март, без оглед на временските услови.
Интензитетот на сообраќајот надвор од градовите е умерен, а на граничните премини засега нема подолги задржувања.
Дополнително, останува на сила и сезонската забрана за сообраќај преку националниот парк Галичица, на делницата Охрид – Ресен, која ќе трае до крајот на март.
Надлежните апелираат возачите да ја прилагодат брзината, да внимаваат на можни одрони и да возат внимателно низ клисури, долини и планински премини.
