Во текот на вчерашниот ден полицијата спроведе засилени контроли во повеќе градови низ земјава, при што десет лица биле лишени од слобода поради управување возила без возачка дозвола, со активни забрани или други сериозни прекршоци.
Како што информира Министерство за внатрешни работи на Република Северна Македонија, акциите биле реализирани од повеќе сектори на МВР.
На автопатот Градско – Велес, кај клучка Караслари, бил приведен 35-годишен прилепчанец кој управувал возило и покрај три изречени забрани за возење.
Во Пробиштип бил уапсен 29-годишник од Злетово, кој возел иако имал активна забрана, додека во Тетово полицијата привела 16-годишен малолетник кој управувал автомобил без стекнато право за управување.
Слични случаи се регистрирани и во Гостивар, Куманово, Струмица, Штип и на повеќе локации во Скопје, каде возачи биле фатени без положен испит или без важечка дозвола.
Во еден случај во струмичко, покрај тоа што управувал нерегистрирано возило, возачот превезувал и бесправно исечени огревни дрва, по што возилото и дрвата биле одземени од шумската полиција.
По насоки на јавен обвинител, сите лица се приведени, возилата се одземени, а по целосно документирање ќе бидат поднесени кривични пријави за делото „безобѕирно управување со моторно возило“.
Од полицијата најавуваат дека контролите ќе продолжат и во наредниот период со цел зголемување на безбедноста во сообраќајот.
