Градоначалничката на Скопје, Данела Арсовска, на својот Фејсбук профил сподели пост во кој остро го критикува министерот за транспорт и врши обвинувања за некомпетентност и неразбирање на законските овластувања. Според неа, Министерството за транспорт не е надлежно за градба и градежни инспекции во градот Скопје.
Арсовска истакна дека Град Скопје, согласно законот, е единствена од 81 општина која не располага со градска градежна инспекција, а истовремено се однесува на неколку изјави на министерот за транспорт, за кој вели дека го потценува и не ги разбира надлежностите на локалната самоуправа.
Во постот се споменува и прашањето за безбедносниот сертификат на министерот, кој според неа не успеал да добие сертификат за да биде министер за надворешни работи или за одбрана, па сега мора да биде министер за транспорт, каде, според Арсовска, неговите изјави и потези се неосновани и штетни.
Градоначалничката упати критики и на однесувањето на министерот, наведувајќи дека неговата инволвираност во политиката е погрешна, бидејќи тој не ги поседува интегритетот и храброста да се справи со важни прашања за развојот на државата. Таа потсетува и на најновата правна акција од МВР против дивоградби во Делчево и Македонска Каменица, со што, според неа, уште еднаш се потврдува дека проблемите со градбите не се во Скопје, а туку во помалите општини.
Арсовска ги повикува сите надлежни институции да ги земат во предвид законските рамки и да престанат со давање непотребни и неосновани изјави кои само создаваат конфузија и заблуда меѓу граѓаните.
Оваа реакција на градоначалничката доаѓа по неколку јавни изјави на министерот за транспорт во кои го критикуваше управувањето со инфраструктурните и градежни проекти во Скопје, што ја доведе до овие жестоки обвинувања од Арсовска.
