Москва, 14 март 2025 (МИА) – Рускиот воен суд денеска соопшти дека осудил жител на областа Иркутск во источен Сибир на 14 години затвор за предавство во корист на Украина.
По нејзината инвазија на соседната земја во февруари 2022 година, Русија започна масовна акција против критичарите на војната, а судењата за „предавство“, „тероризам“, „екстремизам“, „саботажа“ и „шпионажа“ се зголемуваат.
-„Убеден поддржувач“ на „Легијата на слободата на Русија“, која е класифицирана како терористичка организација од руските власти, Сергеј Брјуханов „е осуден на 14 години затвор“, се вели во соопштението на Вториот источен окружен суд.
Тој беше обвинет дека контактирал со организацијата која регрутирала волонтери за Украина и се приклучил во нејзините редови, се вели во соопштението на судот.
-И покрај тоа што сфатил дека оваа организација е контролирана и водена од украинските специјални служби и дека спроведува акции насочени кон безбедноста на Русија, Брјуханов извршил „предавство со собирање и пренесување информации за стратешки објекти до Министерството за одбрана, напиша судот.
Тој е обвинет и за гравирање на симболите на организацијата на различни места во Иркутск и ангажирање на неговите роднини да му помогнат во неговите активности, се вели во соопштението.
Од Марија Спасовска Извор МИА
