Вашингтон, 29 мај 2025 (МИА) – Извозот на злато од САД во Швајцарија нагло се зголеми во април на највисоко месечно ниво од 2012 година.
Зголемувањето се случи откако скапоцените метали, вклучително и златото, беа ослободени од американските увозни давачки, покажаа податоците на швајцарската царина. Швајцарија, која се смета за најголем центар во светот за преработка и транзит на злато во прачки, и Велика Британија, која е седиште на најголемиот вон-берзантски пазар во светот за трговија со злато регистрираа значителен одлив на злато во САД во периодот од декември до март.
Со тој потег, трговците се обидоа да се осигурат од ризикот дека широките американски тарифи би можеле да влијаат и на увозот на скапоцени метали.
Податоците на швајцарската царина откриваат дека увозот на злато од САД се зголемил на 63 метрички тони во април, во споредба со само 25,5 тони во март.
Ова претставува највисока регистрирана месечна вредност од почетокот на 2012 година. Вкупниот извоз на швајцарско злато се намали за 31 процент на месечно ниво во април. Во исто време, пратките на злато во САД драстично се намалија, од 103,3 тони во март на само 12,7 тони во април.
Од друга страна, е забележано зголемување на извозот во Обединетото Кралство, што укажува дека златото од САД, преку швајцарските рафинерии, се враќа во лондонските трезори.
Овие промени во меѓународните текови на злато јасно ја одразуваат чувствителноста на пазарот на скапоцени метали кон трговските политики и царинските прописи.
Од Златко Шумковски Извор МИА
