Македонското друштво Илинден – Тирана остро реагираше на, како што ги оценува, неоснованите и тенденциозни напади изнесени во емисијата „Студио Actualno Балкани“ и јавниот настап на Ервис Талури, претставник на таканареченото Друштво за бугарско-албанско пријателство.
Од „Илинден“ порачуваат дека станува збор за координирана медиумска манипулација, чија цел е замолчување на македонските активисти во Република Албанија и дискредитација на Македонската алијанса за европска интеграција и нејзиното раководство.
Според соопштението, настапите во споменатата емисија не се изолиран случај, туку дел од долгогодишна политика на негирање на македонската нација и идентитет, спроведувана преку различни структури и медиумски платформи.
Особено се посочува улогата на Ервис Талури, кој, според „Илинден“, по целосно школување финансирано од бугарската држава – од средно образование до докторски студии – се појавува во Албанија како „експерт“ за бугарско малцинство, со задача да ги релативизира Македонците и да ја напаѓа македонската политичка организација.
Во реакцијата се наведува дека зад ваквите медиумски настапи стои добро организиран механизам, поврзан со бизнисот со бугарски пасоши. Според тврдењата, со години од албански граѓани се наплаќале илјадници евра за лажни „докази за потекло“, потврди и посредување, што претставува модел кој бил предмет и на истраги, апсења и санкции во Бугарија и Албанија.
Македонското друштво „Илинден“ оценува дека ваквите политики се во директна спротивност со европските вредности, човековите права и принципите на демократско општество, нагласувајќи дека притисоците врз македонската заедница во Албанија нема да резултираат со молк.
И покрај, како што наведуваат, постојаните притисоци и обиди за дискредитација, од „Илинден“-Тирана порачуваат дека ќе продолжат одлучно да се спротивставуваат на негацијата на македонскиот идентитет, како во Албанија, така и пред европските институции.
