Во повеќе локации во северниот дел на Грција се појавија летоци со пораки поврзани со идејата за „автономна Македонија“, јавуваат грчките медиуми.
Според нивните информации, летоците содржеле пораки кои се однесуваат на можноста за автономија на регионот познат во историски контекст како Егејска Македонија. Материјалите биле забележани во неколку населени места, по што темата брзо се прошири и на социјалните мрежи.
Грчките медиуми наведуваат дека засега не е утврдено кој стои зад нивното печатење и дистрибуција, но се претпоставува дека зад иницијативата би можеле да стојат поединци или групи поврзани со македонската заедница во тој дел од земјата.
До овој момент нема официјална реакција од надлежните грчки институции, ниту потврда за потеклото на летоците.
Овој настан повторно ги отвори чувствителните прашања поврзани со историјата, идентитетот и политичките аспекти на регионот Македонија, кои со децении претставуваат тема на дебата во поширокиот регионален контекст.
