По повод 123-годишнината од смртта на Гоце Делчев, членови на ОМО Илинден Пирин денеска положија цвеќе пред споменикот на македонскиот револуционер во градот Гоце Делчев, во Пиринскиот дел на Македонија.
Според соопштението, по оддавањето почит пред споменикот, во партискиот клуб бил одржан пригоден осврт за животот и делото на Делчев.
Од организацијата порачуваат дека Гоце Делчев останува симбол на македонската историска борба, но и трајна инспирација за иднината.
„Делчев не е само нашето минато, туку и нашата иднина, кој го осветлува патот кон правдата“, се наведува во пораката по повод одбележувањето.
Со настанот, како што истакнуваат организаторите, Македонците од Пиринска Македонија уште еднаш му оддале почит на еден од најзначајните дејци во македонската историја.
