Тројна сообраќајна несреќа се случила синоќа на улицата „АСНОМ“ во Охрид, во која учествувале три патнички возила.
Како што информира Сектор за внатрешни работи Охрид, во судирот учествувале „фолксваген амарок“, управуван од 24-годишник, „ланчија“ управувана од 37-годишен возач и „мерцедес“ управуван од 35-годишен охриѓанец.
По извршените проверки, било утврдено дека возачот на „амарокот“ управувал под дејство на алкохол, при што му биле измерени 0,71 промили алкохол во крвта. Дополнително, тој имал и три активни забрани за управување моторно возило од „Б“ категорија.
Кај вториот возач било констатирано дека и тој има една изречена забрана за управување, и покрај што седнал зад волан.
По насоки на јавен обвинител, двете возила се одземени, а против двајцата ќе бидат поднесени кривични пријави за делото „безобѕирно управување со моторно возило“.
Истрагата за несреќата продолжува.
