Во општина Пустец, во областа Мала Преспа во Албанија, денеска се одржа традиционалниот Велигденски турнир во мал фудбал, кој и оваа година обедини голем број учесници и љубители на спортот од македонската заедница.
На турнирот учествуваа седум екипи од селата Туминец, Пустец, Долна Горица, Горна Горица и Шулин, како и екипи од гимназијата и основното училиште во Пустец и Здружението на Македонците од Мала Преспа „Зошто“.
По низа натпревари, првото место го освои екипата од Туминец, која го потврди својот победнички континуитет, додека второто место ѝ припадна на екипата од Пустец, која покажа силна игра и спортски дух.
Турнирот имаше не само спортски, туку и симболичен карактер, како настан што ја зајакнува заедницата и ја негува традицијата меѓу Македонците во овој регион.
Најдобрите екипи беа наградени од здружението „ВМРО-Албанија“. Генералниот секретар Кристо Цветко на победничкиот тим од Туминец му додели парична награда од 200 евра, додека второпласираниот тим од Пустец доби 100 евра.
Градоначалникот на општина Пустец, Пали Колефски, изрази благодарност до организаторите, учесниците и публиката, нагласувајќи дека ваквите настани се доказ дека македонскиот дух, традиција и заедништво продолжуваат да живеат во Мала Преспа.
Настанот уште еднаш покажа дека спортот е силен мост на поврзување, но и важен дел од зачувувањето на културниот идентитет на Македонците во Албанија.
