Во Торонто е направен значаен чекор кон економско поврзување на македонската дијаспора, со одржување на првиот состанок на Основачкиот одбор на Канадско-македонската стопанска комора.
Иницијативата има за цел да создаде платформа за вмрежување на македонските претприемачи во Канада, како и за зајакнување на деловната соработка со Македонија.
Во Основачкиот одбор членуваат Милосов Лукароски, Теа Пешева, Диана Индовски, Иван Лукароски и Кирил Колемишевски, кои ја поставуваат основата за пошироко економско обединување на Македонците во Канада.
На првиот состанок биле дефинирани клучните цели на комората, меѓу кои унапредување на трговијата, поттикнување на инвестиции и развој на стопанската соработка меѓу двете земји.
Од Основачкиот одбор посочуваат дека амбицијата е оваа иницијатива да прерасне во силен економски двигател, кој ќе придонесе за долгорочен развој, зајакнување на македонскиот бизнис идентитет во Канада и продлабочување на врските со матичната држава.
Воедно, комората упати повик до сите заинтересирани компании и претприемачи да се приклучат и да станат дел од оваа иницијатива.
