Македонската заедница во Канада продолжува да ја негува својата култура и традиција преку одржувањето на манифестацијата „Денови на македонската литература и култура“ во Торонто.
Настанот, кој традиционално го организира Македонското литературно друштво „Браќа Миладиновци“, ќе се одржи на 19 април (недела) со почеток во 12:00 часот, во салата Б при Македонската православна црковна општина „Свети Климент Охридски“ во Торонто.
Годинава, програмата ќе биде збогатена со учество на повеќе гости и културни содржини. Специјален гостин ќе биде Софија Килибарда, која ќе одржи презентација посветена на македонските просветители, додека како гостин ќе се претстави и ликовниот уметник Сара Тасев.
Посетителите ќе имаат можност да уживаат во изложба на уметнички дела, продажна изложба на македонски книги, како и настапи на ученици од училиштето по македонски јазик и членови на литературното друштво.
Организаторите најавуваат богата културна програма, со цел зачувување и промоција на македонскиот јазик, литература и традиција меѓу дијаспората.
Влезот за настанот е слободен за сите заинтересирани.
