Македонската заедница во Германија добива нова можност за зачувување на јазикот и културниот идентитет, со отворање на македонски паралелки во градовите Трир и Битбург.
Како што информираат организаторите, станува збор за настава наменета за деца на возраст од 7 до 16 години, која ќе биде целосно бесплатна, а финансирана од германската влада.
Преку овие паралелки, младите ќе имаат можност да го изучуваат и негуваат македонскиот јазик, но и да се запознаат со културата, традицијата и вредностите на своето потекло.
Организаторите посочуваат дека ваквата иницијатива е значаен чекор кон зачувување на македонскиот идентитет меѓу иселениците, особено кај помладите генерации.
Заинтересираните можат да се пријават со пополнување на формулар кој се доставува до училиштето, лично или по електронска пошта. Формуларите се достапни и за време на неделните литургии во македонската православна црковна општина „Свети Павле“ во Трир.
Крајниот рок за пријавување е 17 април 2026 година.
