Дваесет и шестгодишен жител на Скопје бил лишен од слобода на подрачјето на Центар, откако полицијата го фатила при примање пари од лице кое претходно го уценувал.
Како што информираат од МВР, на 14 мај 2026 година, полициски службеници од Единицата за насилен криминал – Одделение за насилен криминал при СВР Скопје го привеле Е.И. (26) од Скопје, поради основано сомнение за кривично дело „уцена“.
Според пријавата, ден претходно во полициска станица 61-годишен скопјанец пријавил дека во периодот од 9 до 13 мај на мобилна апликација добивал пораки од лице кое барало од него 8.000 евра, заканувајќи се дека во спротивно ќе објави компромитирачки фотографии, видеоматеријали и разговори.
Како што е наведено, оштетениот се договорил со лицето да му предаде 4.000 евра, при што го договориле местото и времето на примопредавањето. За случајот претходно ја известил полицијата, по што му биле дадени крим-технички обработени пари.
Откако осомничениот го зел ковертот со парите, бил забележан од полициските службеници и веднаш лишен од слобода. При приведувањето, според полицијата, тој оттурнал полициска службеничка, која се здобила со повреди, и се обидел да побегне, но бил фатен и приведен.
По целосното документирање на случајот, против него ќе биде поднесена соодветна пријава.
