Полицијата приведе 43-годишен жител на Гевгелија под сомнение за криумчарење мигранти, откако возилото што го управувал излетало од патот на делницата Богданци – Гевгелија.
Според информациите од МВР, несреќата се случила на 11 април околу 21:20 часот, кај местото познато како „Шарен мост“, кога патничко возило „фолксваген“ со бугарски регистарски ознаки излетало надвор од коловозот. По несреќата, возачот И.Д. (43) го напуштил местото на настанот, но по преземени мерки од полицијата бил пронајден и лишен од слобода наредниот ден.
На местото на несреќата биле затекнати шестмина мигранти од Египет кои се здобиле со повреди. Едно лице се здобило со тешки телесни повреди и било пренесено на лекување во Комплексот клиники „Мајка Тереза“ во Скопје, додека останатите пет мигранти, како и осомничениот возач, се здобиле со полесни повреди.
За случајот е известен јавен обвинител од Основното јавно обвинителство во Гевгелија, а увид на местото извршила екипа на ОВР Гевгелија. По целосно документирање на настанот, против осомничениот ќе биде поднесена соодветна кривична пријава.
