Три лица беа лишени од слобода ноќеска кај наплатната рампа во Гостивар, откако полицијата пронајде и одзеде сомнителни наркотични материи.
Акцијата се случила околу 00:10 часот, кога полициски службеници од Одделението за недозволена трговија со дрога и оружје при ОВР Гостивар ги привеле Е.Е. (40) и Б.С. (48) од Гостивар, како и Ќ.Р. (70) од селото Врањовци.
Според информациите од полицијата, лицата биле забележани во патничко возило „фолксваген бора“ со гостиварски регистарски ознаки. Во моментот на интервенцијата, едно од лицата – Е.Е. – исфрлило пакувања со грутчеста кафеава материја и кафеава прашкаста материја, кои веднаш биле пронајдени и одземени од страна на полицијата.
Осомничените се задржани во полициска станица, а во координација со јавен обвинител против нив во текот на денот ќе биде поднесена соодветна кривична пријава по брза постапка.
Случајот е дел од засилените активности на полицијата за сузбивање на недозволената трговија со дрога и откривање на кривични дела поврзани со наркотични средства.
