Полицијата приведе 15-годишно момче од тетовското село Џепчиште, поради сомнение дека испраќало закани за поставување експлозивна направа и напад во средно училиште во Тетово.
Како што соопшти Министерство за внатрешни работи на Северна Македонија, вчера (13 март 2026 година) околу 13:55 часот, полициски службеници од СВР Тетово извршиле претрес во дом и помошни простории кај Б.М. (44) во селото Џепчиште.
Претресот бил спроведен врз основа на судска наредба, а при него биле пронајдени предмети за кои постои сомнение дека потекнуваат од кривично дело.
Во текот на акцијата присуствувале и претставници од Центар за социјални работи Тетово.
Во врска со случајот, лишен од слобода бил 15-годишниот син на сопственикот на куќата, поради сомнение дека упатувал закани дека ќе постави експлозивна направа и ќе изврши напад во средно училиште во Тетово.
Од полицијата информираат дека по целосно документирање и расчистување на случајот ќе биде поднесена соодветна пријава.
