Македонската дијаспора во Швајцарија продолжува активно да ја промовира македонската традиција и култура. Во градот Ешалан ќе се одржи јубилејниот 25-ти Фестивал на македонската храна, настан кој со години ја претставува македонската кујна пред меѓународната публика.
Фестивалот ќе се одржи на 14 март 2026 година (сабота) со почеток во 18:00 часот, на адреса Pl du Château 4, 1040 Echallens, во организација на Македонско добротворно друштво „Македонија“ – Ешалан.
40 македонски готвачи ќе ја претстават традицијата
На фестивалот ќе учествуваат 40 македонски готвачи, кои со љубов и гордост ќе подготвуваат традиционални македонски јадења. Посетителите ќе имаат можност да вкусат богата македонска трпеза составена од:
- традиционални салати
- домашни пецива
- готвени јадења
- автентични македонски десерти
Според организаторите, секое јадење претставува дел од македонската култура и традиција, пренесувана од генерација на генерација.
Богата програма и традиционална атмосфера
Делот од фестивалот поврзан со готвачите ќе го водат Драгана Стоилова и Слаѓана Велкова, додека логистиката и организацијата ќе ја обезбедат членовите на Македонското добротворно друштво „Македонија“ од Ешалан.
Организаторите очекуваат богата вечера, одлична атмосфера и полни трпези, како и во изминатите 24 години.
Поканата е упатена до сите Македонци кои живеат во Швајцарија, но и до нивните пријатели и швајцарската јавност.
„Дојдете да ја почувствувате топлината на македонската трпеза и да уживате во вкусовите на традицијата“, порачуваат организаторите.
Фестивалот ќе се пренесува во живо
Настанот ќе може да се следи и онлајн. Фестивалот ќе се пренесува во живо на YouTube, како и преку подкаст на Delcevo365.mk, почнувајќи од 18:00 часот.
Од организаторите истакнуваат дека на фестивалот ќе се промовира не само македонската кујна, туку и македонските вина и традиционалното гостопримство.
„Ќе имаме чест пред швајцарските гости да ја претставиме Македонија преку богатството на традиционалната македонска кујна, квалитетните македонски вина и нашето познато гостопримство“, порачаа од здружението.
