Во изминатите 24 часа се регистрирани три сериозни сообраќајни несреќи на различни локации низ земјава, во кои едно лице го загуби животот, а неколкумина се здобиле со тешки телесни повреди.
Од СВР Скопје информираат дека на 25 јануари 2026 година, околу 04:10 часот, било пријавено излетување на патничко возило „форд“ на крстосницата меѓу булеварот „Александар Македонски“, улиците „16 Македонска Бригада“ и „Интернационални Бригади“ во Скопје.
Возилото било управувано од Б.С. (45) од Скопје, кој се здобил со тешки телесни повреди. И покрај итната медицинска интервенција и транспортот во Градска општа болница „Св. Наум Охридски“, лекарите констатирале смрт.
По наредба на јавен обвинител, телото е предадено на Судска медицина за обдукција, а увид на местото извршила полициска екипа од СВР Скопје.
Претходно, на 24 јануари 2026 година во 15:43 часот, во ОВР Кочани било пријавено дека на улицата „Маршал Тито“ во Кочани, патничко возило „фолксваген голф“ излетало од коловозот.
Возачот А.П. (34) од селото Чешиново се здобил со тешки телесни повреди, најпрво констатирани во Општа болница Кочани, по што бил пренесен на понатамошно лекување во Комплекс клиники „Мајка Тереза“ во Скопје. Увид извршила увидна екипа од ОВР Кочани.
Истиот ден, околу 15:15 часот, во ОВР Гостивар било пријавено дека на регионалниот пат Маврово – Дебар, кај Ростушки мост, патничко возило „фолксваген туран“ со албански регистарски ознаки излетало од коловозот и се превртело.
Возилото било управувано од И.Т. (40) од Република Албанија, а во несреќата со тешки телесни повреди се здобила сопатничката С.Т. (69), исто така од Албанија. Повредите биле констатирани во Медицински центар „Св. Еразмо“ во Охрид. Увид извршила екипа од ОВР Гостивар.
Надлежните институции продолжуваат со расчистување на околностите под кои се случиле несреќите.
