Тешка сообраќајна несреќа со смртен исход се случи на магистралниот пат Куманово–Крива Паланка, во атарот на општина Старо Нагоричане.
Според информациите од полицијата, патничко возило „фолксваген голф“, управувано од 25-годишниот С.Т. од село Нерав, најпрво удрило во куче скитник, по што преминало во спротивната коловозна лента и директно се судрило со автомобил „бмв“, зад чиј волан бил 27-годишниот Ф.Ј. од село Длабочица.
Во несреќата со тешки телесни повреди се здобиле двајцата возачи, како и сопатничките од возилото „бмв“, А.С.(20) и С.Ј.(53), сите од Крива Паланка. Повредените биле пренесени во Општата болница во Куманово.
Од здобиените повреди возачот на „голфот“ им подлегнал во болницата, каде лекар ја констатирал смртта. По наредба на јавен обвинител, телото на починатиот е дадено на обдукција.
На местото на несреќата увид извршила екипа на СВР Куманово, а се работи на целосно расчистување на случајот.
