Четириесет и тригодишна жена од Велес пријавила во полиција дека била измамена за 16.592 денари, откако добила СМС порака за наводен сообраќаен прекршок што требало да го плати.
Како што информира полицијата, случајот бил пријавен на 7 мај 2026 година во 16 часот во СВР Велес. Според пријавеното, два дена претходно, на 5 мај, жената добила порака во која било наведено дека треба да плати казна за наводно сторен сообраќаен прекршок.
Во пораката имало и линк до веб-страница со насоки за плаќање, а било наведено и дека, доколку ги следи упатствата, ќе може да плати само половина од сумата.
Откако ги внела податоците од својата банкарска сметка, во неколку наврати добила известување за неуспешно плаќање, но подоцна забележала дека од сметката ѝ биле повлечени пари.
Од полицијата велат дека се преземаат мерки за расчистување на случајот.
